認識阿ka的日子：

我認識阿ka既日子，其實唔係好耐，記得第一次見阿ka，係喺2005年5月4日 星期三 晚 東區尤德夫人醫院，當晚有我、Elsa、Jacky、Duncan、Mon、Tobi、Cherie去探佢，我見既阿ka唔駛帶氧氣、有精神、有氣力，佢仲同我哋有講有笑添，佢亦有講佢自己後生時既事。

2005年8月8日 星期一 上午，收到阿ka既消息，佢昏迷左。呢段時間大家只有為他祈禱。

2005年8月中，收到阿ka既消息，佢醒番喇 ~ 感謝神！

第二次見阿ka，係喺2005年9月2日 星期五 晚 葛量洪醫院，今次有Elsa、我、Celia、Howard，見到阿ka瘦削左好多、又要長期帶住氧氣、只可以食流質食物、精神就麻麻、呼吸亦好急速，探阿ka既時間雖然好短，但我已經感受到，佢身體狀況比上次我見佢既時候差左好多，臨走前我哋都有同阿ka一齊祈禱，喺祈禱既時候，我有種好強烈既感覺，個種感覺係叫我開祈禱會，呢種感覺喺我心內為持左兩日，我同Elsa講左呢件事之後，我哋就決定左喺每個月既第二個星期六 下午三時正至四時正舉行。

第三次見阿ka，喺係2005年9月13日 星期二 下午四時多 葛量洪醫院，真係冇諗過今次見阿ka係最後一次既見面，今次得我一個去探阿ka，其中一個目的係送一份禮物比佢，份禮物係集合左E癲園各位弟兄姊妹既關懷與祝福，佢當時收到呢份禮物好開心，佢真係續張續張去睇，佢睇到有好多個弟兄姊妹都未曾見過，亦未聽過佢哋既名，佢都見到大家既一份心意。我眼見既阿ka精神好左好多、見佢可以開始食番少少固體食物、講野時都有番氣力、不過有樣野冇變既就係，佢仍然要長期帶住氧氣。

2005年10月10日 星期一 晚 收到Elsa電話，佢話阿ka入左深切治療部，精神狀態欠佳！佢既意志仲差！又冇嘜信心，我唔知道除左祈禱之外，仲可以做啲嘜！諗番之前阿ka昏迷既消息，到而家每次當我一聽到阿ka既壞消息時，我都好似有啲傷痛，個種感覺好難去講。我只係覺得我識阿ka既時間咁短，點解我會有咁既感受？？呢樣係我最唔明白既地方。

2005年10月14日 星期五 收到消息阿Ka仍然係深切治療部，但佢已經插左喉，對阿ka既說話能力同飲食方面都有一定既困難，醫生建議佢瞓多啲覺，所以幫佢打左麻醉藥！我哋唯有繼續仍然為阿ka祈禱。

到左2005年12月9日 星期五 下午兩點十五分左右收到消息，阿ka已經在2005年12月9日上午時分安息主懷。當我收到Elsa同我講阿ka離開既消息時，我即時既反應係「吓 ... ... (>.<”) 」，隔左五至十分鐘之後，我個腦開始浮現番我認識阿ka的日子、人既生命、再諗番自己仲有幾多時間呢？！

我同自己講，阿ka黎梗既追思會或安息禮拜，我一定會抽時間出席，記念呢位弟兄。

阿ka離開左我哋呢個事實，令到我哋學到要珍惜生命呢樣野。
〝珍惜生命〞？！
其實咩叫做珍惜生命？？珍惜？？講？！係人都會話知、都會話明。如果真係要去做，又有邊個做到呢？？對後生仔女黎講，〝珍惜生命〞根本就唔知道係啲嘜？！要去做，就更加係一件難事。可能就連我自己都係咁！

腦海中突然浮起深恩不變既歌詞 ... ...
《 深 恩 不 變 》
求 來 讓 祢 寶 血 ， 洗 去 我 心 的 不 潔 ， 原 諒 我 一 切 的 過 錯 ，
明 白 我 不 配 ， 得 祢 多 番 恩 恤 我 ， 我 心 知 虧 欠 實 太 多 。
祈 求 獲 祢 指 教 ， 剩 餘 日 子 怎 數 算 ， 能 讓 我 心 裡 得 智 慧 。
全 賴 祢 光 照 ， 解 去 心 中 的 封 閉 ， 罪 已 洗 ， 是 何 等 的 可 貴 。
遇 變 遷 深 恩 不 變 ， 落 淚 時 撫 慰 在 前
遇 困 險 恩 手 必 見 ， 患 難 中 有 祢 引 牽
神 啊 ！ 在 祢 千 載 看 來 ， 像 一 天 剛 過 ， 如 夜 裡 一 更 的 轉 去 。
惟 願 我 一 生 一 世 ， 安 躺 主 恩 裡 ， 盡 記 取 是 耶 穌 的 應 許 。